Höfundur var á leiðinni til Grindavíkur á sýningu Helgu Sigurðardóttur.  Veðrið var frábær undirbúningur undir að skoða vatnslitasýningu. Íslenskur útsynningur sem sýndi allar sínar flottustu hliðar. Himininn þungbúinn á köflum og hér og hvar glitti í bláan himininn.

Þar demdi sólin sér í gegn með svo mikilli gleði að það myndaðist skær regnbogi. Stundum varð hann tvöfaldur en aðallega svo skær í litum að ég hef varla séð hann fegurri. Ég reyndi að ná myndum af honum, en sjón er alltaf sögu ríkari.

Helga Sigurðardóttir opnaði sýningu á vatnslitamyndum í Saltfisksetrinu í Grindavík þann 19. mars 2005.  Sýningin stendur til 4. apríl. 

Aðalviðfangsefni sýningarinnar er:  Orkuflæði lands og fjalla.  Er krafturinn, stórfengleg fegurð og litadýrð í íslenskri náttúru og umhverfi.  Verkin túlka sterk áhrif náttúrunnar.  Notkun kröftugra lita og litasprenginga eru einkennandi.

Sýningargestir Helgu voru glaðbeittir, enda margt fallegt að sjá.